Comunicado conxunto 10-M: Día da Clase Obreira Galega

Na véspera do 47 aniversario do 10 de Marzo do 1972 dende as organizacións xuvenís e estudantil nacionalistas e independentistas da Galiza queremos lembrar os feitos que conmemoramos todos os anos coma o Día da Clase Obreira Galega.

A mocidade nacionalista e independentista consideramos fundamental lembrar o fito fundacional do sindicalismo galego de clase. As folgas obreiras de 1972 en Ferrol e Vigo, cidades nas que a industria comezara a implantarse na década anterior supuxeron un punto de inflexión para a creación dun sindicalismo galego combativo e consciente da nosa realidade nacional e ao mesmo tempo un momento central na loita antifranquista na Galiza, que foi duramente reprimida co asasinato de Amador e Daniel, os obreiros sindicalistas da factoría de Bazán en Ferrol.

As mozas galegas de clase traballadora atopámonos na altura do 10 de marzo do 2019 nunha situación de extrema precariedade e con nulas perspectivas de futuro. Os salarios miserentos, a elevadísima taxa de desemprego xuvenil e en moitos casos a obriga de abandonar o noso país para poder vivir dignamente son os instrumentos que empregan o grande capital español e transnacional para seguir a aproveitarse do noso traballo, gañando cada vez máis a costa de que nos vivamos peor.

A solución para rachar coa miseria está na nosa man, neste 10 de marzo chamamos a practicar a insubmisión ás políticas reaccionarias e neoliberais impostas polo estado español, a UE e o capital. Somos conscientes de que tanto o rol de dependencia ao que nos condena o estado español, coma o propio funcionamento do sistema capitalista fan imposíbel rachar con esas políticas e é por iso que chamamos a loitar pola independencia da Galiza e a rachar co capitalismo para que as mozas galegas poidamos ter unhas condicións de vida dignas, con emprego digno e na terra.

Ao mesmo tempo chamamos a participar das mobilizacións convocadas para mañá 10 de marzo pola Confederación Intersindical Galega a nivel comarcal​, convencidas de que a resposta aos ataques do capital cara a clase traballadora galega só pode darse a través da mobilización e o conflito encadrados nunha estratexia revolucionaria no camiño dunha Galiza ceibe e sen explotación.

Viva a loita da clase obreira galega!

Estas son as mobilizacións convocadas pola CIG

·         Vigo: Manifestación desde a Dobrada ás 12h

·         Pontevedra: Praza da Peregrina, 12h

·         Vilagarcía: Praza de Galiza, 12h

·         Compostela: Praza Roxa, 11:30h

·         A Coruña: Manifestación desde a Praza de Vigo ás 12h

·         Ferrol: Manifestación desde o Monumento ao 10 de marzo ás 12h

·         Lugo: Manifestación desde o Edificio Sindical ás 12h

·         Ourense: Praza do Ferro, 11:30h