Galiza Nova vém de estar presente nesta Diada de Catalunya, fortalecendo os laços de solidariedade com o Jovent Republicà e com os Països Catalans. Neste 11 de setembro de 2026 a juventude e o conjunto da sociedade catalá voltou a demostrar a sua capacidade mobilizadora nas ruas, com umha manifestaçom massiva em reivindicaçom da independência nacional para o país. Galiza Nova faz umha valoraçom positiva desta jornada de reivindicaçom, na que se puido olhar, nom só uns resultados mui bons na populaçom geral, senom também na juventude mais nova que se rebela contra a espanholizaçom da sociedade catalá.
Contudo, Galiza Nova nom só participou em atividades e açons do dia 11 de setembro, senom também nas jornadas internacionalistas organizadas polo Jovent Republicà nos dias 12 e 13 de setembro. Nesta Llavor Internacionalista puidemos partilhar espaço com vinte organizaçons de esquerda de diferentes países, assi como trasladar em palestra os nossos posicionamentos políticos.
Em primeiro lugar, tratamos a questom de como o espanholismo e a extrema direita atuam na Galiza, falando do papel de espanholizaçom e desgaleguizaçom que cumpre o Partido Popular e da atual situaçom residual na que se encontra a extrema direita ultraespanholista, en tanto o povo galego nom permite a sua entrada nas instituiçons, mas também pola falha de açom política em geral. No entanto, mália as diferentes formas de praxe política, ambas forças políticas partilham alvos políticos certos, fazerem da nossa identidade, língua e cultura questom folclórica e residual no nosso país.
Em segundo lugar, falamos de como no nosso projeto político podemos converter a luta pola libertaçom nacional numha alternativa social e de progresso. Neste sentido, puidemos fazer a valoraçom do nacionalismo popular que a Galiza Nova pratica, entendendo o nosso processo de libertaçom nacional como um processo ligado à libertaçom social entanto, para a Galiza Nova, a soberania da Galiza nom resulta simplesmente um fim identitário, mas também um fim de melhora da qualidade das classes populares e trabalhadoras galegas.
Por último, puidemos destacar algumha campanha política concreta na que puidéssemos ligar a libertaçom nacional com a construçom de umha sociedade mais justa. Destacamos o exemplo da campanha pola emancipaçom, na qual a Galiza Nova conseguiu conetar a necessidade da emancipaçom nacional para a consecuçom da emancipaçom da juventude galega, entanto é preciso termos soberania política para podermos desenvolver políticas reais e em chave galega a prol de avançar em vivenda, empregos, transporte, ensino, sanidade e serviços públicos dignos.
Galiza Nova quer agradecer profundamente que o Jovent Republicà nos tivesse convidado a participarmos nestas jornadas, assi como também o trato político e pessoal cara os companheiros da Galiza Nova que puidérom assistir. Estamos certas de que a Catalunya representa esperança para o povo galego e para todos os povos do mundo que lutam pola libertaçom nacional. Mais cedo do que tarde, Catalunya e Galiza acadaremos a nossa legítima liberdade.
