I Certame “O galego vai contigo. Novas plataformas para crear comunidade.”

Desde Galiza Nova convocamos o noso primeiro certame de creación de contidos a través de TikTok co gallo de visibilizar e dinamizar a comunidade galegofalante nesta plataforma. En relación coa nosa campaña O galego vai contigo, queremos  contribuír ao espazo onde poder expresarnos e consumir contido en galego. Consideramos que as novas plataformas e redes sociais son un espazo onde o galego, e a conciencia do seu uso, deben estar presentes para lograr así unha normalización plena. A mocidade facemos uso e desfrute das redes e polo tanto temos dereito a consumir o seu contido en galego. 

Buscamos xente moza que quixer amosarnos por que o galego vai con ela (que relación ten coa lingua, experiencias, anécdotas, preocupacións…). Terán cabida todas aquelas pezas que reflexionen dun xeito ou outro sobre a nosa lingua, xa sexa desde o humor, o didactismo…

 

BASES DO CERTAME

Obxectivo

  • Visibilizar e dinamizar a crecente comunidade galegofalante na plataforma TikTok
  • Procurar unha polifonía de voces que poñan en diálogo o porqué do galego. Por que o galego vai contigo?
  • Contribuír a dar forma a un espazo onde todas podamos expresarnos na nosa lingua
  • Normalización de produción e consumo de contidos en galego nas plataformas e redes sociais de uso habitual

 

Condicións de acceso

  • Empregar como lingua de participación o galego
  • Non haberá restricións de idade. 
  • A temática dos vídeos deberá xirar do uso do galego, sendo válidas todos os enfoques que se lle queiran dar: desde a importancia do uso do galego, situacións concretas de galegofalantes, dereitos lingüísticos, problemáticas que atravesan os neofalantes, explicacións concretas sobre a lingua, etc.
  • Quedarán excluídas aquelas propostas misóxinas, racistas, etc. ou que atenten á liberdade lingüística doutros falantes
  • Cada participante pode presentar un máximo de 2 vídeos, malia que só se outorgará un premio por persoa.
  • A forma de participación poderá ser individual ou colectiva
  • Máxima duración 1 min

 

Período de inscrición e participación

O prazo de presentación dos vídeos comprenderá desde o mesmo día da presentación do certame de forma pública até o domingo 23 de outubro ás 23:59.

  • Os vídeos deberán ser subidos á plataforma TikTok 
  • Deberase mencionar a @galizanova 
  • Empregar o hashtag #vaicomigo
  • Empregar, se o móbil o soporta, o filtro “vaicomigo” que se poderá atopar na páxina de TikTok de Galiza Nova 
  • Ollo! Unha vez subido o vídeo e até o peche do certame a conta desde a que se suba deberá ser pública para podermos acceder á súa visualización
  • Os vídeos que cumpran os requisitos de acceso serán resubidos á conta oficial de @galizanova para favorecer á súa difusión

 

Xurado

O xurado estará composto por tres creadoras de contido en TikTok en galego: Sara Seco Rial (@sarasecorial), María Rúa Rodríguez (@pradorua) e Iris Gestoso (@irisgestoso). A este xurado sumaráselle a participación dunha representación de Galiza Nova. 

 

Premios

O fallo do xurado farase público a través da mesma plataforma TikTok así como no resto de redes de Galiza Nova na semana do 31 de Outubro. A organización enviará igualmente unha comunicación ás persoas gañadoras.

  • 1º Premio. Paquete de xogos en galego:
    Ti non es de aquí?
    Vacaloura
    Virus
  • 2º Premio. Paquete literario en galego:
    As Ramonas de Ana Cabaleiro
    O libro negro da lingua galega de Carlos Callón
    Non penses nun elefante rosa de Antía Yáñez
    seique de Susana Sanches Arins
    Estou a estudar português de Valentim Fagim
    A Balada dos Unicornios de Ledicia Costas
  • 3º Premio. Paquete de material:
    Semente de vencer: crachá, pulseira e camisola.
    Colante GZ
    Parche Serea Castelao