O BNG vén de reclamar que os fondos comunitarios que anunciou a comisaria de Emprego, Marienne Thysen, se adiquen a loitar contra o desemprego xuvenil e teñan en conta o éxodo da mocidade galega, e obrigue ao Estado español a destinar parte deses recursos a medidas que eviten esa emigración masiva.
“Por exemplo, que o Goberno central desenvolva políticas públicas que garantan empregos para a mocidade dignos e de calidade, en lugar de permitir que se malgasten os fondos en programas inservíbeis incapaces de combater a exclusión do mercado laboral e mesmo a marcha do país da mocidade galega”, demanda a portavoz do BNG en Bruxelas e secretaria de Política Internacional, Ana Miranda.
Os fondos comunitarias para combater o desemprego entre a mocidade están orientados, segundo lembrou a eurocomisaria de emprego a estados membros cuxa taxa de paro xuvenil supere o 25%, porcentaxe que se duplica no Estado español.
A nosa eurodeputada Ana Miranda subliñou que miles de mozas e mozos tiveron que marchar do país ante a falta de alternativas laborais, nun contexto de crise agravado polas políticas de recortes do PP, en particular en Educación e investigación, neste caso responsábel da fuga de investigadoras. “A situación está a ter consecuencias dramáticas non só en termos persoais, da vida de cada unhas das persoas afectadas, senón tamén en termos colectivos pola caída en picado da demografía no país”.