Galiza Nova da comarca da Coruña cumpriu un ano máis coa súa clásica cita na véspera de Reis, destavolta, o Concello de Cambre foi a parada escollida.
Logo de saír laiandose na prensa no día de onte sobre o seu frustado Plan Xeral de Ordenación Municipal, Manuel Rivas, alcalde do PP de Cambre, recibiú hoxe unha visita inesperada e cargada de agasallos.
Agasallos simbólicos para o Alcalde de Cambre pola súa nefasta xestión no último ano
Galiza Nova, mocidades do BNG, fíxolle entrega, através do Rexistro Municipal dunha serie de agasallos alegóricos á súa xestión no último ano. Gaspar entregoulle un disco do grupo “El Consorcio” titulado no cénit da casualidade “Lo que nunca muere” en clara alusión á frustrada vontade do PP de liquidar o Consorcio das Mariñas e resucitar a Área Metropolitana, e ao esperpento protagonizado en datas recentes por alcaldes, plenos municipais e interventores varios en relación co asasinato non consumado do ente supramunicipal. Desde Galiza Nova animan ao rexedor a montar un guateque co resto de alcaldes da comarca e bailar ao son de tan oportuno LP.
Melchor achegou unhas velas en clara alusión ao apagón sufrido nas parroquias de Sigrás, Meixigo e o propio núcleo de Cambre na pasada Noiteboa. E Baltasar fixo entrega dun tren de xoguete, un tanto paupérrimo e raquítico, como o servizo que presta Renfe en Cambre e Cecebre logo dos recortes perpetrados polo Partido Popular.
Desde a organización xuveníl nacionalista destacan que a loita diaria na rúa e nas aulas, non está exenta de certas doses de retranca, é por eso que Galiza Nova, integrada por unha mocidade alegre e combativa, realiza ano tras ano unha actividade que é xa un clásico na programación de Reis da Comarca da Coruña e que logo de visitar A Coruña, Arteixo, Betanzos, Oza dos Ríos e Cambre, camiña xa pola súa decimosegunda edición.
