Galiza tinguiuse de loito na véspera do Día da Patria máis triste, ao se producir o accidente ferroviario que deixou 79 mortes e numerosas/os feridas/os.
Ao coñecer esta traxedia, Galiza Nova e o BNG acordaron suspender todas as celebracións e actos programados para o 24 e 25 de xullo en solidariedade coas vítimas, persoas feridas e as súas familias.

Galiza de loito.

Despois destes días de loito e dor, desde Galiza Nova consideramos preciso que se aclaren as causas do accidente coa maior rapidez, e que as empresas ADIF e RENFE e o Ministerio de Fomento e gobernos galego e estatal expliquen por que non existen as medidas tecnolóxicas e materiais de seguridade neste tramos das vías. Esiximos ao mesmo tempo que se poñan as medidas necesarias de maneira urxente para que nunca máis se repita esta traxedia.
Este dramático contexto demostrou, por outra banda, a heroicidade das veciñas e veciños que auxiliaron ás vítimas, e a capacidade de actuación que teñen os servizos públicos galegos e a importancia de mantelos e reforzalos e de nunca acabar con eles a través dos múltiples recortes aos que están sometidos por parte do goberno galego e español.